សារស្វាគមន៍របស់រដ្ឋមន្ត្រីក្រសួងអធិការកិច្ច

  យុគសម័យនៃបច្ចេកវិទ្យាព័ត៌មានវិទ្យា និងឌីជីថលបានក្លាយជាកម្លាំងជំរុញចរន្តនៃការកែទម្រង់នៅក្នុងបរិបទនៃសកលភាវូបនីយកម្មឱ្យកាន់តែឈានឆ្ពោះទៅរកតម្លាភាព គណនេយ្យភាព និងការទទួលបានព័ត៌មានយ៉ាងឆាប់រហ័សអំពីការអភិវឌ្ឍសេដ្ឋកិច្ចសង្គម នយោបាយ ទំនាក់ទំនងអន្តរជាតិ និងការផ្លាស់ប្តូរអារ្យធម៌ និងព័ត៌មានរវាងគ្នានិងគ្នា។ ការណ៍នេះបានសបញ្ជាក់ឱ្យឃើញថាគេហទំព័រក្រសួងអធិការកិច្ចនឹងដើរតួនាទីជាកញ្ចក់ឌីជីថលដ៏មានសារៈសំខាន់ សម្រាប់ឆ្លុះបញ្ចាំង និងបង្ហាញដល់សាធារណជនជាតិ និងអន្តរជាតិ នូវរាល់ព័ត៌មានពិត និងទាន់ហេតុការណ៍ ពាក់ព័ន្ធនឹងសកម្មភាពនិងសមិទ្ធផលការងាររបស់ក្រសួងអធិការកិច្ច ក៏ដូចជាវឌ្ឍនភាព និងសមិទ្ធផលការងារសំខាន់ៗរបស់រាជរដ្ឋាភិបាលក្នុងកិច្ចការកែទម្រង់ និងការពង្រឹងអភិបាលកិច្ចល្អ។ មិនតែប៉ុណ្ណោះ គេហទំព័រក្រសួងអធិការកិច្ច នឹងក្លាយជាយន្តូបករណ៍អេឡិចត្រូនិក ដែលបម្រើដល់សាធារណរជន ក្នុងការងារសិក្សាស្រាវជ្រាវ វេទិកាជូនដំណឹង ព័ត៌មាន ឆ្លើយតបនូវសំណូមពរ ការទទួលពាក្យបណ្តឹង និងមតិយោបល់របស់សាធារណជនទូទៅ រួមទាំងការអនុវត្តតួនាទីភារកិច្ចរបស់ក្រសួង សំដៅពង្រឹងប្រសិទ្ធភាពក្នុងវិស័យអធិការកិច្ចនៅកម្ពុជា។